 |
असोज १८ – दसैं आइसक्दा पनि लमजुङका मुख्य बजारमा मानिसको भीड देखिँदैन । गएका वर्षमा मानिसको भिड देखिने सुन्दर बजार, भोटेओडार, बेसीशहर, भोर्लेटार लगायतका बजारमा यस वर्षको दसैंमा राम्रो व्यापार हुन नसकेको व्यापरीले बताएका छन् ।
‘विगतमा दसैं सुरु हुनुभन्दा हप्तौँ अगाडि मानिसहरु बजार झर्थे, किनमेल गर्थे, व्यापारीलाई भ्याइनभ्याई हुन्थ्यो तर अहिले त्यस्तो छैन’ भोटेओडार बालुनेमा १५ वर्षदेखि फेन्सी पसल चलाउँदै आउनुभएका रामकृष्ण अधिकारीले भन्नुभयो, ‘अहिले राम्रो लाउन र मिठो खान वर्षदिनको दसैँ नै कुर्नुपर्छ भन्ने चलन छैन त्यसैले पनि व्यापार नभएको हो ।’ उहाँका अनुसार यसवर्षको व्यापार खासै सन्तोषजनक छैन । पूर्वी लमजुङको मुख्य व्यापारिक केन्द्र नै भोटेओडार हो । भोटेओडारमा भार्ते, गौँडा, इलमपोखरी, अर्चलबोट लगायतका ठाउँबाट मानिसहरु किनमेल गर्न भोटेओडार झर्ने गर्दछन् । तर अहिले किनमेलकै लागि भोटेओडारसम्म झर्नेको संख्या कम हुँदै गएको छ । गएका वर्षमा भन्दा यसपालीको दसैँमा व्यापार घटेको बालुनेमा किराना स्टोर्स सञ्चालन गर्दै आउनुभएका प्रदीप श्रेष्ठले बताउनुभयो ।
गाउँगाउँमा गाडी पुगेकाले पनि बजारमा किनमेल गर्नेको चहलपहल घटेको लमजुङ उद्योग वाणिज्य संघ भोटेओडारका अध्यक्ष रेवती कुमार श्रेष्ठले बताउनुभयो । ‘गाउँगाउँमा मोटर पुगेको छ । आवश्यक सामान गाडीले गाउँमै पुर्याइदिएको छ । मानिस सौखिन भएका छन् । गाउँदेखी धाएर को पो बजार आउँछन् र ?’ उहाँले भन्नुभयो, ‘त्यसैले बजारमा किनमेलका लागि आउनेको संख्या घटेको छ ।’
|
0 comments:
Post a Comment